好多人都會諗,緊係要識得賺錢啦,所以大家都好著重去尋找一啲賺錢之法,而且越賺得快越好,所以果啲細價股、期指、期權特別吸引,因為大家都想賺快錢。
但係點解咁多人學左咁多呢啲方法,都仲未致到富?
因為純粹識賺錢,係絕對唔夠,而有一個好重要既元素,係好多人都忽略左,就係你識賺錢之餘,都要留得到錢先。
講真,純粹以表現計,你要短時間賺八成、賺幾倍,其實一啲都唔難,只要市況就,而你又用埋啲好高槓桿既方法,閒閒地都倍倍聲,但係如果一睇錯,又輸返九成既,咁就無意思,其實只係賭緊錢。當然,賭錢既野,總會有成功例子,有時有運起上黎,可以係短時間賺好多,但係呢啲成功例子絕對唔係佔大多數,而當大家磨爛蓆繼續賭既,大家都知結果通常都會係點。
要喺股票市場致富,唔係要賭錢、賭眼光,而係要識得賺錢之餘,賺左返黎都要留得住。咁點樣先可以留到呀?咪就係無論咩情況,你都唔可以讓自己有機會輸大錢。
即係話,如果你買左啲股票,你覺得佢長線無問題,所以你唔止蝕,由得佢坐返上去,咁你問自己,係咪真係完全無機會輸大錢呢?係咪真係一定唔會跌落去?係咪真係一定唔會跌得多? 如果唔係既話,咁你就要諗,你一直以來都只係識得賺,而唔識得留?
如果賺完啲錢留唔到既,試問又點致富呢?
所以而家唔係要問個市點樣睇、跌夠未、邊啲股票撈得呢啲問題,第一步要做既,就係嚴守止蝕先啦。
學巴菲特話齋,當退潮既時候,就知道邊個無著泳褲。
投資並唔係賭錢賭眼光,而係好沉悶地用策略,賺時賺多多,輸時輸少少,逐級逐級上,一步一步致富。
Comments