尋日留低條問題俾大家反思:「如果你手上持有蟹貨,撇除了輸錢的事實,如果你當初沒有買到,你現在是否想買?」
有啲朋友答想,可能佢地對自己所坐住既貨好有信心,深信一定會升上去,所以跌左落黎更加要買,當然佢地咁有信心,我無意動搖佢地,亦都唔係呢條問題想帶出黎既主題,所以唔多講喇,不過大家都要留意返自己有無機會睇錯呢,如果睇錯左你會唔會承受好大既損失呢?呢一點真係要計得清楚,先至好搏。
我反而想帶出,如果你既答案係唔想,某程度上喺呢一刻,你起碼覺得果隻股票唔係一個好投資,你可能覺得佢仲要跌,又或者如果啲錢喺度,寧願買其他更有潛質既野,都唔想買返佢.......咁好喇,點解而家仲要揸住呢?
當然,影響大家做出呢個決定既最主要原因,係因為本身已經洗濕左個頭,輸左錢,唔想輸,所以被迫坐住,希望遲啲升返可以唔駛輸,我完全理解,但係係咪真係唔沽貨,就等於無輸呢?相信大家都知道呢個諗法係自己呃自己,當睇唔到就算,但係你既資產係唔係已經跌左?唔通你唔沽貨,就代表你隻貨本身買入時既價值?
投資心理學入面有一個散戶經常犯既謬誤叫做「損失厭惡 (Loss Aversion)」,即係當人面對同樣數量既收益同埋損失既時候,會認為損失更加令佢地難以忍受。舉三個例子:
(1)當我地擲公字既時候,如果擲中公可以得到$1200,擲中字要輸 $1000,明明係比較著數,但係絕大部份人都唔敢玩,因為怕左果50%輸既機會
(2)如果(A)無論公同字,都可以得到$1000,而(B)擲中公可得$2000,擲中字就無贏無輸,明明Expected Value係一樣,但結果多數人都會揀A,因為可以穩賺,而寧願放棄賺得更加多既機會
(3)如果無得唔玩,(A)無論公定字,都要輸$1000,而(B)擲中公唔駛輸,擲中字要輸$2000,結果大部份人點揀?你又會點揀?
絕大部份既人都會揀B,因為佢地有機會唔駛輸,而往往忽略左有機會輸更加多
呢個正正係一般散戶買股票經常有既心態,股票有得賺既,賺左先啦,但往往可能錯失賺得更加多既機會。而坐住既蟹貨呢?「沽左佢輸好多喎」,就係呢個諗法,明知喺呢一刻唔係一個好好既投資,都寧願賭一舖,希望最終唔駛輸,但係往往忽略一旦賭輸左,會輸得更加多。你慢慢思考吓,如果你一直做緊既野係,贏你又唔會贏得多,但係輸既你就選擇去賭,除非你次次都咁好彩賭得中,但係呢件事你都知係無可能嘛,而賭輸左就會越輸越多,坐埋成堆無眼睇既蟹貨。試問長期咁樣贏就贏少少,輸就輸多多,你有乜可能唔輸?
好多人只係著重想知「我隻股票可唔可以唔駛走?」「坐唔坐得返上去?」呢啲問題,我更重視既係大家既心態同埋操作,係令你可以長遠賺錢,就算俾你今次賭中左,但係個操作長遠係輸既,你最終都係會輸返,所以無意思。
當然會有人話:「我地明,但係我地散戶要做好難」。如果你真係咁諗的話,你已經將自己既位置擺左喺散戶既位置,你知道咁樣做係唔好,都要繼續做,咁樣係你既選擇,但係你要知道你長遠係一定輸。如果你真係長遠想贏的話,係咪應該做返正確既操作,而唔係不斷靠運氣希望唔駛輸呢?如果喺股票市場上致富,真係你咁想達到既目的,我相信無論遇到咩困難,你都會用盡你既方法迎刃而解。但係如果你又話難,又話做唔到,其實你已經選擇左。
坐住蟹貨要止蝕,短線一定係痛,但係如果大家避開面對呢個痛楚,繼續留喺個comfort zone度,對你長遠達至喺股票市場致富呢個目標係咪好事呢?要留喺comfort zone但係長遠痛苦,定係徹底改變換黎長遠既勝利,就留返俾你自己去揀喇。
Comments